புதன், 31 டிசம்பர், 2008

புதிய ஆண்டு



இன்னும் சில மணி நேரத்தில் நாம் ஒரு புதிய ஆண்டினுள் கால் தடத்தை பதிக்க உள்ளோம். புதிய முகங்கள், புதிய சுற்றுச்சூழல், புதிய இடங்கள், புதிய கனவுகள் போன்ற புத்தம் புது விஷயங்களை நாம் சந்திக்க உள்ளோம். கடந்த வருடத்தில் நடந்த நல்ல விஷயங்களை நாம் ஒரு பாடமாக எடுத்துக்கொள்வோம். கெட்டதை மறந்து விடுவோம். பள்ளிக்கூடம், கல்லூரி போன்ற புதிய உலங்கங்களுக்கு செல்லும் அணைவருக்கும் எங்களின் வாழ்த்துகள்.எங்களின் வலைப்பதிவின் சார்பாக அணைவருக்கும் எங்களின் புத்தாண்டு நல்வாழ்த்துகள்.




ஆக்கம்:

கலையமுதன் ரவீந்திரன்
தெமேங்கோங் இப்ராஹிம் ஆசிரியர் பயிற்சி கல்லூரி

திங்கள், 29 டிசம்பர், 2008


நல்லாசிரியரின் நல்லியல்புகள்

தோற்றப்பொலிவு
சுறுசுறுப்பு
தூய உள்ளம்
நேரிய வாழ்க்கை
மொழிப் பற்று
மொழிப் புலமை
அறிவாற்றல்
உணர்திறன்
உணர்த்தும் திறன்
கற்பனைத் திறன்
சொல்லும் திறன்
விளக்கும் திறன்
தெளிவுற அறிந்திடுதல்
மாணர்வர்களிடத்து அன்பு
உடன் ஆசிரியர்களிடம் நல்லுறவு
வரலாற்றுணர்வு
அறிவியல் அணுகுமுறை
விழிப்புணர்ச்சி
அறியும் அவா
ஆய்வு வேட்கை
பயிற்றுவித்தலில் ஆர்வம்
காலம் போற்றுதல்
சமூகக் கடமையுணர்வு
வாய்மை
தனித்தன்மை
தலைமைப் பண்பு
வழிகாட்டுதல்
தியாகம்
சான்றான்மை

எல்லா ஆசிரியர்களுக்கும் இந்த பண்புகள் இருக்க வேண்டும் என்று கூற முடியாது. இவை அனைத்தும் இருந்தே ஆக வேண்டும் என்றுதான் கூறவேண்டும்......

ஆக்கம்:

கலையமுதன் ரவீந்திரன்
தெமேங்கோங் இப்ராஹிம் ஆசிரியர் பயிற்சி கல்லூரி


வெள்ளி, 26 டிசம்பர், 2008

இன்றைய திகதியில்

கடந்த வருடம் இதே திகதியில் மனித இனத்தை அழிக்கும் சக்தி வாய்ந்த சுனாமி என்ற பேரலை எத்தனையோ மனித உயிர்களை மூழ்கடித்தது. வருடங்கள் உருண்டோடினாலும் அந்த பேரலையின் நினைவுகள் சிலரின் எண்ணத்தில் இன்னும் பசுமையாக உள்ளது. இன்று வரை இதற்கு இயற்கை காரணமா இல்லை மனிதர்கள் மீது இந்த பூமி தாய் கொண்ட ஆத்திரமா என்பது ஒரு கேள்விக்குறியாக உள்ளது. இது போன்ற சுனாமி அலை மீண்டும் நிகழுமா என்பது கடவுளின் கையில் தான் உள்ளது.

இந்த சுனாமி பேரலையில் தப்பித்தவர்கள் மிகவும் குறைவு என்று தான் சொல்ல வேண்டும்.அவர்களில் ஒருவர் மேழுள்ள படத்தில் உள்ள குழந்தைதான்.யாரென்று தெரிகின்றதா ?

ஆம் துளசி என்ற குழந்தைதான் அது. நூற்றுக்கணக்கான மனிதர்களை கொன்ற அதே நீர்தான் இந்த குழந்தையை காப்பாற்றியது.அலையில் அடித்து செல்லப்பட்ட குழந்தை மீண்டும் அதே அலையில் மிதந்து கொண்டே உயிர் தப்பியது.பாவம் இந்த குழந்தையை கொல்ல அந்த பேரலைக்கு மனசு வரவில்லை என நினைக்கின்றேன்.

இந்த பேரலை மீண்டும் நிகழாமல் இருக்க நாம் கடவுளை பிராத்தனை செய்வோமாக ........

இந்த பேரலையின் அழிவை யாராலும் மறக்க முடியாது.

ஆக்கம்:

கலையமுதன் ரவீந்திரன்
தெமேங்கோங் இப்ராஹிம் ஆசிரியர் பயிற்சி கல்லூரி

வியாழன், 25 டிசம்பர், 2008

கிருஸ்துமஸ் வாழ்த்துகள்


இந்த இன்பமான நாளில் கிறிஸ்துமஸ் தினத்தை கொண்டாடும் அனைத்து கிருஸ்துவ குடும்பங்களுக்கும் எங்களின் வலைப்பதிவின் சார்பில் கிறிஸ்துமஸ் வாழ்த்துகள். இந்த கிறிஸ்துமஸ் தினம் உங்களுக்கு மகிழ்ச்சியையும் ஆனந்தத்தையும் அளிக்கும் என்பதில் சிறதும் சந்தேகம் இல்லை.

வாழ்த்துகளுடன்
தாய்மொழி வலைபதிவார்கள் குழு

வெள்ளி, 19 டிசம்பர், 2008

முக்கிய தினங்கள்

நமது நாள்காட்டியை அடக்கடி பார்ப்பது ஒரு வழக்கமான செயல். ஆனால் சில தேதிகள் சில முக்கிய தினங்களாக விளங்குகின்றன.அவைகளில் சில உங்களுக்காக.

மே 1- உலக தொழிலாளர் தினம்.

ஜனவரி 31- உலக தொழுநோய் ஒழிப்பு தினம்.

ஏப்ரல் 7- உலக சுகாதார தினம்

ஏப்ரல் 22- உலக பூமி தினம்

மே 3 - அனைத்துலக ஆற்றல் தினம்.

மே 31 - புகையிலை இல்லாத தினம்

ஜுன் 5 - உலக சுற்றுச் சூழல் தினம்

நவம்பர் 14 - உலக நீரழிவு தினம்

டிசெம்பர் 1 - உலக எய்ட்ஸ் தினம்

டிசம்பர் 10 - மனித உரிமைகள் தினம்

ஆக்கம்:

கலையமுதன் ரவீந்திரன்
தெமேங்கோங் இப்ராஹிம் ஆசிரியர் பயிற்சி கல்லூரி

அன்பே செல்வம்


'அள்ளக் குறையாதது;கொடுத்தால் தீராதது' என்று கல்வியைப் பற்றிச் சொல்வார்கள். அன்பும் அப்படித்தான். கல்வியை விடவும் மேம்பட்டது அன்பு!

நாம், நம் பெற்றோர், உடன் பிறந்தவர்கள், உறவினர்கள், நண்பர்கள், என்கிற எல்லைகளைக் கடந்து , எலோரிடமும் அன்பு காட்டும் தன்மை தான் தெய்வகுணம்!

தனக்கு
உதவியவர்களை மட்டுமல்ல; தனக்குத் துன்பம் தந்தவர்களையும் மன்னித்து இரட்சிக்கும் படிவேண்டிய அந்த தெய்வ குணத்தின் அடையாளம்தான் இயேசு பெருமான்!

அன்பு
என்பது, எந்த எதிர்பார்ப்பும் இல்லாதது; எந்த விதத்திலும் சுயநலம் அற்றது; எல்லா உயிர்களிடமும் நேசம் கொண்டது; எந்த சிவனிடமும் வெறுப்பில்லாதது என்கிற உண்மை விளக்கமாக உலவிய இயேசு பெருமானின் அவதாரத் திருநாள் இந்த மாதம் வருகிறது.

அந்த
அன்பு நம் அனைவரின் எண்ணங்களிலும், செயல்களிலும் இடம் பெறட்டும். அதுதான், கிருஸ்துமஸ் திருநாள் நமக்கு உணர்த்தும் செய்தி!

ஆக்கம்:கலையமுதன் ரவீந்திரன்
தெமேங்கோங் இப்ராஹிம் ஆசிரியர் பயிற்சி கல்லூரி

புதன், 3 டிசம்பர், 2008

நல்லதோர் விடுமுறை............

பள்ளி மாணவர்களே மற்றும் எஸ்.பி.எம், எஸ்.தி.பி.எம். எழுதி முடித்த மாணவர்களே உங்கள் அனைவருக்கும் எனது மனமார்ந்த வாழ்துக்களை தெரிவிப்பதோடு இந்த விடுமுறையை நல்வழியில் கழிக்குமாறு வேண்டிக் கொள்கிறேன். விடுமுறை நாட்களில் பள்ளிக்கூடத்தை மறந்து விடாதீர்கள் வருகின்ற ஆண்டுகளில் என்னென்ன செய்ய வேண்டும் என்பதனை இப்பொழுதே யோசிக்க துவங்குங்கள். நாட்களை வீணே செலவழிக்காமல் நாட்டுக்கும்,வீட்டுக்கும்,சமுதயதிர்க்கும் மேலும் உடலுக்கும் நன்மை விளைவிக்கும் வகையில் பயன் படுத்துங்கள்.

காலத்தை நாம் மதிப்போம் போற்றுவோம்;காலம் நம்மை அழைத்து செல்லும்...
ஆக்கம்:கீர்த்தி செல்வராஜு
தெமேங்கோங் இப்ராஹிம்
ஆசிரியர் பயிற்சி கல்லூரி

புதன், 26 நவம்பர், 2008

கைத்தொலைபேசி:அவசியமா, அனாவசியமா?


இன்றைய தொழில்நுட்ப வளர்ச்சியில் மனிதர்கள் தத்தம் அன்றாட வாழ்க்கையில் பல புதிய சாதனங்களைப் பயன்படுத்தி வருகின்றனர். இப்படிப்பட்ட பொருள்கள் நமது நேரத்தைச் சேமிக்கின்றதென சிலர் கூறுகின்றனர். மேலும் சிலர், இந்தக் கருத்தை மறுத்துத் தற்கால சாதனங்கள் மனித குலத்தின் மத்தயில் சோம்பல் குணத்தை வளர்க்கின்றன என்றும் கூறியுள்ளனர். எது எப்படி இருப்பினும், இன்றுவரை மனிதர்களுக்கு உதவியாகவும் அதற்கு மாறாக அபாயகரமாக விளங்குவதும் கைத்தொலைபேசி என்றே கூறலாம்.

ஒரு கைத்தொலைபேசியின் மூலம் நாம் ஒரு தகவலை மிகவும் சுலபமாக மற்றொருவரிடம் சேர்த்துவிடலாம். அவர் எவ்வளவு தொலைவில் இருந்தாலும் கைத்தொலைபேசியைப் பயன்படுத்தி அந்தத் தகவலைத் தேவையானவரிடம் சேர்த்துவிடலாம். கூற வேண்டிய தகவலை நம்மால் கூற முடியாமல் போனாலும் குறுந்தகவல்(S.M.S) என்ற எளிய முறையில் நாம் அந்தத் தகவலைச் சேர்த்துவிடலாம். இந்த முறை தற்பொழுது இளைஞர்களின் மத்தியில் மிகவும் பிரபலமாகி வருகின்றது. ஒருவரிடம் அழைத்துப் பேசுவதைத் தவிர்த்து, இவ்வாறு செய்வதால் பணமும் சிக்கனப் படுத்த முடியும். தற்கால கைத்தொலைபேசிகளில் உள்ள சில தொழில் நுட்ப விஷயங்கள் பலரை பிரமிக்க வைக்கின்றது என்று சொன்னால் அது மிகையாகாது. படம் பிடிக்கும் வசதி, செவிக்கு இனிய கானங்கள் கேட்பதற்கும், ஏன் இணையத்தை வலம் வர கூட வாய்ப்பு தந்திருக்கின்றது கைத்தொலைபேசி.

எது எப்படி இருந்தாலும், கைத்தொலைபேசி சில நேரங்களில் அனாவசியமாகவும் தோற்றமளிக்கின்றது . தொலைப்பேசியின் கட்டணம் கட்டப்படாமல் இருந்தாலோ அல்லது கைத்தொலைபேசியில் போதிய பணத்தொகை இல்லாமல் போனாலும் நாம் ஒருவரை தொடர்பு கொள்ள முடியாது. ஏன்,ஒரு குறுந்தகவல் கூட அனுப்ப முடியாது. சிலர், கைத்தொலைபேசியைத் தொல்லைபேசியாக மாற்றுகின்றனர். பொது இடங்களிலும், பள்ளிகளிலும், கைத்தொலைபேசிகளைப் பயன்படுத்துகின்றனர். சில வருடங்களுக்கு முன்பு கைத்தொலைபேசியின் பயன்பாட்டினால் புற்றுநோய் வரக்கூடிய வாய்ப்பு இருக்கின்றது எனக் கண்டறியப்பட்டு கூறப்பட்டாலும், அது நிருபனமாக்கப்படவில்லை. மேலும், கைத்தொலைபேசியின் தொடர்பு அலை மருத்துவமனைகளில் உள்ள சில கருவிகளின் வாசிப்பைத் தவறுதலாகத் தருவதால், நோயாளிகளுக்கு அபாயகரமான விளைவுகளை விளைவிக்கக்கூடும் என்றும் கூறப்படுகின்றது.

ஆகவே, கைத்தொலைபேசியின் பயன்பாடு மனிதர்களுக்கு நன்மையும் அளிக்கின்றது, தீமையும் அளிக்கின்றது என்றே கூற வேண்டும். குறிப்பாக, மாணவர்களாகிய நாம் கீழ்க்காணும் விதிகளைக் கடைப்பிடித்தால் அனைவருக்கும் நன்மையே:
1. கருத்தரங்கிலோ அல்லது கூட்டத்திலோ கலந்து கொள்ளும்போது கைத்தொலைபேசியின் ஒளியை அமைதி நிலையில் () வைக்கவும் அல்லது அடைத்து விடவும்.
2. பலர் இருக்கும் இடத்தில் தொலைபேசியில் உரையாடும்போது குரலைத் தாழ்த்திப் பேச வேண்டும்.
3. முக்கியமான அழைப்பு கிடைத்தால், ஆள் நடமாட்டம் இல்லாத இடத்திற்குச் சென்று பேசலாம்.
4. குறுந்தகவல் அனுப்புவதைப் பழக்கமாக்கிக் கொள்ள வேண்டும்.
5. கைத்தொலைபேசியை குறிப்பிட்ட நேரத்தில் மட்டும்தான் பயன்படுத்த வேண்டும். பாட நேரத்திலோ அல்லது கலந்துரையாடலின் போதோ பயன்படுத்துவது நமது கல்விக்கும் பணத்துக்கும் கேடு என்றால் அது மிகையாகாது.

ஆக்கம்:

கலையமுதன் ரவீந்திரன்
தெமேங்கோங் இப்ராஹிம் ஆசிரியர் பயிற்சி கல்லூரி

சனி, 22 நவம்பர், 2008

காலம் பொன்னானது

அன்புள்ள மாணவமணிகளுக்கு எனது முத்தான வணக்கங்கள். இது விடுமுறை காலம். உங்களில் பலர் பி.எம்.ஆர் சோதனையை முடித்துவிட்டு வீட்டில் அமர்ந்திருப்பீர்கள். இன்னும் பலர் எஸ்.பி.எம்., எஸ்.டி.பி.எம். தேர்வுகளை எதிர் கொண்டு ஆயத்தம் செய்து கொண்டிருப்பீர்கள்.உங்கள் அனைவருக்கும் ஒரு செய்தி. வாழ்க்கையில் நாம் சில பொக்கிஷங்களை இழந்துவிட்டால் அதனை மீண்டும் மீட்ட முடியாது.

அதில் ஒன்றுதான் நேரம். அதனைத் தயவு செய்து இழந்துவிடாதீர்கள்.ஒவ்வொரு நிமிடமும் உங்கள் வாழ்க்கையை மாற்றக் கூடிய வல்லமைக் கொண்டது. நேரம் என்பது உயிரைப் போன்றது. ஏன் அதைவிட மதிப்பில் உயர்ந்தது என்றுகூட சொல்லலாம். பணத்தால் கூட அதனை நம்மால் மீட்ட முடியாது. ஹாரவி மேகை என்ற ஒரு வெளிநாட்டவர் நேரத்தை பற்றி ஒரு சில வரிகளில் கூறியுள்ளார். இதோ அது உங்களுக்காக

நேரம் இலவசம், ஆனால், அதை நீங்கள் உங்களின்
சொத்தாக ஆக்க முடியாது,
ஆனால் நீங்கள் அதனைப் பயன்படுத்தலாம்,
நேரத்தை நீங்கள் வைத்துக்கொள்ள முடியாது,
ஆனால் நீங்கள் அதை நல் முறையில் செலவழிக்கலாம்,
அதை நீங்கள் தொலைத்துவிட்டால், மீண்டும் பெறமுடியாது


ஆக்கம்:
கலையமுதன் ரவீந்திரன்

தெமேங்கோங் இப்ராஹிம் ஆசிரியர் பயிற்சி கல்லூரி

செவ்வாய், 11 நவம்பர், 2008

உங்கள் வாழ்க்கை உங்கள் கையில்

உடல் ஊனமுற்ற இவரால் சாதிக்கும் பொழுது நம்மால் நிச்சயம் இயலும்..

எஸ்.பி.எம் தேர்வை எழுதவிருக்கும் மாணவர்களுக்கு முதலில் தெமேங்கோங் இப்ராஹிம் ஆசிரியர் பயிற்சிக் கழகத்தின் தமிழ் மாணவர்களாகிய எங்களின் வாழ்த்துகள். எஸ்.பி.எம் என்ற ஒரு நிலையை அடைந்த உங்களுக்கு மற்றுமொரு வாழ்த்துகள். உங்கள் வாழ்கையை முடிவெடுக்கும் ஒரு நிலைக்கு நீங்கள் வந்துவிட்டீர்கள். இந்தத் தேர்வு உங்களின் வாழ்க்கை இலட்சியத்தை அடைவதற்கு ஒரு முக்கியமான படி. ஏறுங்கள் மாணவர்களே! வாழ்கையின் வெற்றிப்படியின் உச்சத்திற்குச் சென்று வெற்றிக்கனியைப் பறிக்கச் செல்லுங்கள்!

பெற்றோர்கள் தத்தம் அன்புச் செல்வங்களுக்கு ஒரு பக்கபலமாக இருக்க வேண்டுமே தவிர ஒரு பயமாக இருக்கக் கூடாது. பெற்றோர்கள் அவர்களின் பிள்ளைகள் சிறப்பான முடிவை எடுக்காவிடில், அவர்களைத் தயவு செய்து வசை பாடாதீர்கள். அவர்களின் முயற்சிக்குப் பாராட்டுத் தெரிவித்து அவர்களுக்கு ஊக்கம் தாருங்கள். அரசாங்கம் சார்ந்த இயக்கங்களும் சார்பற்ற இயக்கங்களும் சிறந்த முடிவுகளைப் பெற்ற மாணவர்களுக்கு ஊக்கம் தருவதோடு, சிறந்த முடிவைப் பெறாத மாணவர்களைக் கை கழுவி விட வேண்டாம். எது எப்படி இருந்தாலும், இந்த வருட எஸ்.பி.எம் தேர்வில் இந்திய மாணவர்கள் நிச்சயமாக ஒரு புதிய சாதனையைப் படைக்க முடியும்.......

உனக்கு என்ன வேண்டும் என்று நினைத்தால் அதனை நீ சாதிக்கலாம்!
அதற்கு எதிர்மாறானவன் நீ என்று உன்னைக் காட்டிக் கொள்ளாதே!

ஆக்கம்:
கலையமுதன் ரவீந்திரன்

தெமேங்கோங் இப்ராஹிம் ஆசிரியர் பயிற்சி கல்லூரி

ஞாயிறு, 9 நவம்பர், 2008

தீர்ப்பு நமது கையில்....

ஒவ்வொரு வருடமும் ஆறாம் ஆண்டு மாணவர்களுக்கான சோதனை அதாவது யூ.பி.எஸ்.ஆர் தேர்வு தவறாமல் இடம் பெறுகின்றது. இந்த வருடம் சற்று மாறு பட்ட அம்சத்தில் கணிதமும் அறிவியலும் ஆங்கில மொழியில் போதிக்க பட்டு சோதனையும் நடத்தப்பட்டது. யூ.பி.எஸ்.ஆர் தேர்வுக்கான முடிவுகள் பதின்மூன்றாம் திகதி நவம்பர் மாதம் வெளியேற்ற உள்ளதாக தகவல் ஊடகங்கள் தெரிவிக்கின்றன. பெற்றோர்கள் மிகுந்த ஆர்வத்துடன் தங்கள் செல்வங்களின் முடிவுகளை எதிர்பார்த்து காத்துக்கொண்டிருக்கின்றனர். அவர்களின் அவா என்ன ஆகும்?


ஆங்கில மொழியில் கணிதமும் அறிவியலும் போதிக்க படுவது சரியா தவறா என்று விவாதிக்க இது தக்க தருணம் அல்ல, இருப்பினும் வரப்போகும் தீர்ப்புகள் நல்ல தீர்வை காணுமா? அல்லது........? ஆங்கில மொழியில் அறிவியலும் கணிதமும் கற்று தரப்படுவது உகந்ததா இல்லையா என்பதை யூ.பி.எஸ்.ஆர் முடிவுகள் நிர்ணயிக்கும். இடை நிலைப்பள்ளி மாணவர்களுக்கு ஆங்கில மொழியில் கணிதமும் அறிவியலும் கற்று தரப்படுவது சரியாக அமைந்தாலும் தொடக்க பள்ளி மாணவர்களுக்கு ஆங்கில மொழியை விட தாய் மொழியில் கற்று தர படுவதே சிறப்பாக அமையும்.

அவனின்றி ஓர் அணுவும் அசையாது என்பது போலவே காரணமின்றி எந்த ஒரு சிந்தனையும் தோன்றாது. அதாவது ஆங்கில மொழியில் கற்று தர படுவதால் நன்மைகள் உண்டு இல்லை என்று நான் சொல்ல வில்லை ஆனால், அப்படி ஆங்கில மொழியில் கணிதமும் அறிவியலும் கற்று தர படுவதால் நமது தாய் மொழியின் சிறப்பு குறைக்கபடுவதாக தோன்றுகின்றது. மேலும், தாய் மொழியை சரி வர கற்காமல் பிற மொழியில் கற்பதால் தாய் மொழியின் முழு கூறுகளையும் அறிந்து கொள்ள இயலாது. இதைத்தவிர்த்து நமது தாய் மொழியின் அடையாளத்தை நாமே அளித்துக் கொள்ளலாமா?

சுருங்கக் கூறின், தொடக்கப்பள்ளியில் ஆங்கில மொழியில் கணிதமும் அறிவியலும் கற்று தருவதை விட இடை பள்ளியில் தாரளமாக கற்று தரலாம். மேலும் இன்னும் சில நாட்களில் வெளிவர இருக்கும் யூ.பி.எஸ்.ஆர் தேர்விற்கான முடிவை அற ஆவலாக உள்ளோம். நம்மை தவிர்த்து பெற்றோர்கள்,அரசாங்க நிர்வாகங்கள், அரசாங்க சார்பற்ற அமைப்புகள்,அதோடு எழுத்தாளர்கள் ஆகிய அனைவருமே மிகுந்த ஆவலுடன் விமர்சனம் செய்ய காத்துக் கொண்டிருக்கின்றனர்.

நல்லதே எண்ணுவோம்,நல்லதே செய்வோம்,நல்லதே நடக்கும்..!

ஆக்கம்:கீர்த்தி செல்வராஜு
தெமேங்கோங் இப்ராஹிம் ஆசிரியர் பயிற்சி கல்லூரி

செவ்வாய், 4 நவம்பர், 2008

உண்மை அன்பு எங்கே…இதோ பாருங்கள்…

ஞானி ஒருவர் கூறுகிறார், “வானத்தைப் பிழிந்து மழையாக்குவதும், மழையை வானமாக்குவதும் எனக்குச் சுலபம். ஆனால், என் சக்தியை நிரூபிக்க அது மட்டும் போதாது…உண்மையான சக்தி அன்பு”.

அன்பினால் மட்டுமே ஒரு மனதைத் தொடவும் மனதின் தன்மையை மாற்றவும் முடியும்! “அன்பே சிவம்”, “சிவமே அன்பு” கடவுளை நம்புகின்றவருக்குக் கடவுளே அன்பு. நாத்திகருக்கு அன்பே கடவுள். இதிலிருந்து மீள்பவர் எவருமிலர். திருமந்திரத்தில் திருமூலர் இதையே அழகாய் பாடியும் உள்ளார்,

“ அன்பும் சிவமும் இரண்டென்பர் அறிவிலார்
அன்பே சிவமாவ தாரும் அறிகிலார்
அன்பே சிவமாவ தாரும் அறிந்தபின்
அன்பே சிவமாய் அமர்ந்திருந்தாரே.”

இறைவனது தோற்றம் மங்களகரமானது. இருப்பிடமும் மங்களகரம். அன்பை நுகருபவர் இறைவனை அடையும் வழியை எளிதில் பெறுவர்.

கொடுப்பதும் மன்னிப்பதும் அன்பு; பெறுவதும் மறப்பதும் வாழ்க்கை.

Love lives by giving and forgiving; self lives by getting and forgetting.

நல்லவராய் இருப்போம்; நல்லதே செய்வோம் (be good, do good) நமக்கும் நல்லதே நடக்கும்!

உண்மை அன்பில் இறைவன் குடிகொண்டுள்ளான் என்பதை நாம் உணர வேண்டும். இறைவனை தேடி அலையாதீர். அவன் உங்களிடமுள்ள அன்பில் இருக்கிறான். அன்பை அனைவரிடத்திலும் செலுத்துங்கள், இறைவன் உங்களை அவன் அருளால் அணைப்பான். உங்களை வெறுப்பவர்களை நீங்கள் விரும்புங்கள், உங்களை விரும்புகிறவர்களை ஒரு போதும் வெறுக்காதீர்!

இதோ கள்ளங்கபடமற்ற அன்பைப் பொழியும் இந்த மழலைகளிடத்திலும் அவன் இருக்கிறான்…


உண்மை அன்பைப் பார்த்தீர்களா?!


என்றென்றும் அன்புடன்,
மலர்விழி சுப்ரமணியம்

சனி, 1 நவம்பர், 2008

உறவு


உறவு என்ன நீ அடித்து விளையாடும் பூப்பந்தா?
நீ வா என்று அழைக்கும் பொழுது வரவும்...
போ என்று துரத்தும் பொழுது போகவும்...
நான் என்ன உணர்வற்ற பிணமா?
உந்தன் அன்பை உண்மை என்று எண்ணி என் வாழ்வில் தோற்றுவிட்டேன்....
என் பாசத்திற்குரியவரே! அன்பை புறக்கணிக்காதே காரணம் நீ இன்னல்படும் நேரம்
உன்னை தேடிவருவது உந்தன் பணம் அல்ல உண்மையான பாசம்...
இந்த பிரிவு நிரந்தரம் அல்ல...
எனது பந்தம் தொடரும்...
உன்னை இழந்து தவிக்கும் சின்ன இதயம்

ஆக்கம் :யோகேஸ்வரி தனபால்
தெமெங்கோங் இப்ராஹிம் ஆசிரியர் பயிற்சிக் கல்லூரி

செவ்வாய், 28 அக்டோபர், 2008

அனைவருக்கும் தீபாவளி வாழ்த்துகள்



தீபத்திருநாளாம் தீமைகள் ஒழிந்திடுமாம்,
இல்லம் முழுவதும் இன்பம் பொங்கிடுமாம்,
வாசலில் வண்ண கோலம் மின்னிடுமாம்,
மலர்களினூடே மகிழ்ச்சியும் மலர்ந்துடுமாம்,
சினுங்களுடன் சிறுவர்கள் விழித்தெழ,
பட்டுடுத்தி கொண்டாட்டமாய்,
இறையாசியுடன் பெற்றோரின் வாழ்த்துடனும்,
இனிப்புப் பதார்த்தங்களோடு,
இனிதுடனே பிறந்திடுமாம்...
அழகாய் அசைந்தாடும் சுடரொளி
எங்கள் இருள் போக்கும் - தீபாவளி

அனைவருக்கும் தீபாவளி வாழ்த்துகள்_


என்றென்றும் அன்புடன்,
மலர்விழி சுப்ரமணியம்

திங்கள், 27 அக்டோபர், 2008

தித்திக்கும் தீபத் திருநாள்.


வணக்கம் அன்பர்களே, வைகாசி மாதத்தில் ஒவ்வொரு ஆண்டும் அமாவாசை திதியன்று பூக்கின்றது நமது தித்திக்கும் தீப திருநாள். வருடங்கள் உருண்டோடுகின்றது ஆனால், நமது இந்தியர்களோ இன்றளவும் உருளுகிரார்களே தவிர ஓடாமல் நின்ற இடத்திலேயே நிற்கின்றனர். நான் கூற வருவது என்னவெனில், நாடு சுதந்திரம் அடைந்து ஐம்பத்து ஒன்று வருடம் ஆகி விட்டது. நாம், அதாவது இந்தியர்கள் எவ்வளவோ செலவு செய்கின்றோம், சுய ஆசைகளுக்கு நம்மை அர்ப்பணிக்கின்றோம் , மேலும் தேவை இல்லாத எவ்வளவோ காரியங்களில் ஈடு படுகின்றோம்.

சுதந்திரம் பெற்றால் மட்டும் போதாது; அதனை நல்வழியில் நாம்தான் கையாள வேண்டும். பெரும்பான்மையினர் எதற்குத் தீபத் திருநாளைக் கொண்டாடுகின்றோம் என்று கூட தெரியாமல் இருக்கின்றனர். அப்படி உள்ள பட்சத்தில் தீப திருநாள் தேவை தானா???

தேவை இல்லை என்று நான் கூற முற்படவில்லை மாறாக இனிமேலாவது தீப திருநாளின் அர்த்தம் அறிந்து கொண்டாடுவோமாக என்றுதான் சொல்ல கடமை பட்டுளேன். அன்பர்களே நமக்காக துயர் கொள்ளும் பலரை மனதில் கொண்டு இந்த தீப திருநாளை ஆடம்பரம் இல்லாமல் குறுகிய கால கட்டத்தில் எளிய முறையில் கொண்டாடுவோம்.

அனைத்து இந்திய நல் உள்ளங்களுக்கும் எனது தீபத் திருநாள் நல் வாழ்த்துகள்.

சுடர் விட்டு எரிகின்றது அங்கு தீப ஒளி,
இங்கு படர் விட்டு எரிகின்றது நம் இந்திய ஒளி,
இரு ஒளி ஒரு சேர்ந்து சுடர் தரும் நாளை எண்ணி,
வாழ்கையை நல் முறையில் செலுத்துவோம்....

ஆக்கம்: கீர்த்தி செல்வராஜு
தெமேங்கோங் இப்ராஹிம் ஆசிரியர் பயிற்சி கல்லூரி

வியாழன், 23 அக்டோபர், 2008

‘ஒளியொன்றுகை’

வணக்கம் நண்பர்களே, 21.10.2008 இரவு 8 மணிக்குத் தொடங்கி 10.50 வரை மிகவும் சிறப்பான முறையில் ‘ஒளியொன்றுகை’ எனும் தீபாவளி சிறப்புக் கலை இரவு எங்கள் கல்லூரியில் நடந்தேறியது. இந்நிகழ்வில் ஜொகூர் மாநில தமிழ்ப்பள்ளிகளின் கண்காணிப்பாளர் திரு.நடராஜன் அவர்களும், கல்லூரியின் விரிவுரையாளர்களில் ஒருவரான திரு. ஓமனோரா அவர்களும் அவர்தம் துணைவியாரும் கலந்து சிறப்பித்தனர். மேலும், கல்லூரியின் துணை முதல்வரும் வருகை அளித்திருந்தார்.

தொடக்கம் முதல் இறுதி வரை இந்நிகழ்ச்சி முழுமையாக நம் தாய்தமிழில் நடந்தேறியது. வாசலில் அழகான வண்ணக்கோலம், பயிற்சி ஆசிரியர்களின் மின்னும் ஆடைகள், தீபாவளி வாழ்த்து அட்டைகளால் அலங்கரிக்கப்பட்ட அந்த சின்னஞ்சிறு மண்டபம் பார்ப்பவர்க்கு அன்றுதான் தீபாவளி என்ற எண்ணத்தை உண்டாக்கியது.


வருக!வருக! என்று அனைவரையும் வரவேற்கின்றது தீபக் கோலம்


இந்தியர்கள்
‘இயல், இசை, நாடகம்’ ஆகிய முத்தமிழுக்குச் சளைத்தவர்கள் அல்லர் என்பதை அனைத்துப் பயிற்சி ஆசிரியர்களும் தங்களின் படைப்புகளைச் சிறப்புடன் படைத்தனர். நவீன நடனங்களுக்குக்கிடையே இடம்பெற்ற நம் பாரம்பரிய விளக்கு நடனம் விழிகளுக்கும் மனத்திற்கும் சுவை சேர்த்தது. இடையிடையே ஒளிபரப்பட்ட ஒளிக்கீற்று (slide presentation) மேலும் நிகழ்வை மெருகேற்றியது. 'தீபாவளி பிறந்த கதை' எனும் குறும்படம் அனைவரின் கவனத்தை ஈர்த்தது. விழிகளுக்கு மட்டுமின்றி வருகை தந்த அனைவருக்கும் அறுசுவை உணவு வழங்கப்பட்டது.


மிகவும் நேர்த்தியாகவும் சற்றும் பிசராமல் நிகழ்வை ஏற்பாடு செய்தவர்களுக்கு ஒரு சபாஷ்! தொடர்ந்து பல அரிய நிகழ்வுகளை ஏற்பாடு செய்து வெற்றி காண வாழ்த்துக்கள்! திரு நடராஜன் அவர்கள் தமது உரையில் “பயிற்சி ஆசிரியர்கள் அனைத்துக் கலைகளையும் கற்றறிய வேண்டும். அதோடு, சமுதாயத்திற்கு நலம் பயக்கும் நிகழ்வுகளை ஏற்பாடுச் செய்தும் கலந்தும் சிறப்புச் செய்ய வேண்டும்” எனக் கேட்டுக்கொண்டார்.


ஆக, தொடர்ந்து நம் சமயம் மற்றும் மொழி தொடர்பான நிகழ்வுகள் நடத்தப்படும் என எதிர்பார்க்கிறேன்.


நாம் வளர, நம் கலை, கலாசாரம், பண்பாடு, மொழி என்றும் வாழ்க!


அனைவருக்கும் தீபாவளி வாழ்த்துக்கள்


என்றென்றும் அன்புடன்,
மலர்விழி சுப்ரமணியம்


ஞாயிறு, 19 அக்டோபர், 2008

இந்த நாட்டின் சொந்தக்காரர் யார்?


இந்த அழகான நாட்டிற்குச் சொந்தக்காரர்கள் யார் என்று ஒரு கேள்வி எழுந்து வந்தால், அதற்குப் பதில் ஒரே வார்தையில்தான் அடங்கியுள்ளது. இது நமது நாடு என்று சொல்வதில் ஒவ்வொரு மலேசியக் குடிமகனும் பெருமைப்பட வேண்டும்.

இந்தியர்கள், சீனர்கள், மலாய்க்காரர்கள் என்று பிரித்துப் பார்க்காமல் இது மலேசியர்களின் நாடு என்று பெருமையோடு சொல்பவர்கள் மிகவும் குறைவு என்றுதான் சொல்ல வேண்டும். மலேசியாவில் வாழும் ஒவ்வொரு குடிமகனுக்கும் இது எனது நாடு என்ற எண்ணம் மேலோங்க வேண்டும். சற்று உள்நோக்கினால், நமது நாடு மற்ற நாடுகளை விட எவ்வளவோ வித்தியாசமான நாடு என்று சொல்லலாம். வித்தியாசமான பண்பாடு, பல்வேறான கலாசாரங்கள், பலவகையான உணவுகள் போன்ற பல விசயங்களில் நாம் வேறுபட்டுள்ளோம். எது எப்படியாயினும், நான் ஒரு மலேசியன் என்று சொல்ல நானும், நீங்களும், அனைவரும் பெருமைப்பட வேண்டும்.
ஓர் இனத்தின் எண்ணிக்கை குறைவாக இருந்தாலும், மற்ற இனத்திற்குக் கிடைக்கும் உரிமைகள் அனைத்தும் அந்த இனத்திற்கும் சென்று சேர வேண்டும். இன, மதம், போன்ற பிரிவினைகளுக்கு ஒற்றுமை ஒன்றே தீர்வு என்று சொன்னால் அது மிகையாகாது.

சுதந்திரம் பெற்று 51 ஆண்டுகள் ஆகிவிட்டாலும், ஒவ்வொரு மலேசியக் குடிமகனும் இந்த நாட்டிற்குச் செய்ய வேண்டியது கடலளவு உண்டு. நாடு நமக்கு என்ன செய்தது என்று கேட்காமல், நாம் நாட்டிற்கு என்ன செய்தோம் என்று நாம் சிந்திப்போம். இது எனது நாடல்ல, உனது நாடும் அல்ல, இது நமது நாடு.

வாழ்க மலேசியா!

ஆக்கம்: கலையமுதன் ரவீந்திரன்
(
தெமெங்கோங் இப்ராஹிம் ஆசிரியர் பயிற்சிக் கல்லூரி)

சனி, 18 அக்டோபர், 2008

"வீராங்கனைப் பாட்டி"

இது லண்டனில் நடந்த ஒரு உண்மை சம்பவம். மூன்று இளைர்கள் ஒரு அறுபத்து எட்டு வயது மூதாட்டியின் பணப்பையை திருடிக்கொண்டு தப்பித்து ஓட முயற்சி செய்தபோது, சம்பந்தப்பட்ட மூதாட்டி அந்த மூன்று இளைர்கள் வேகமாக ஓடி மீண்டும் அந்த மூன்று இளைர்களைப் பிடித்து தனது பணப்பையை மீண்டும் பெற்றுக்கொண்டாராம்.

இது எப்படி சாத்தியம் என்று காவல் துறையினர் விசாரணை செய்த பொழுது,அந்த மூதாட்டி முன்னாள் நீண்ட தூர ஓட்ட போட்டிகளில் மிகவும் பெயர்போனவர் என்று தெரிய வந்துள்ளது.ஆங்கிலத்தில் ஒரு பழமொழி உண்டு. அட்டையைப் பார்த்து புத்தகத்தை எடைபோடாதே என்று.அந்த மூன்று இளைர்களும் அந்த பாட்டியின் வயதையும் தப்பாக எடைபோட்டு விட்டார்கள்.

16 ஆம் திகதி அன்று வெளியாக்கப்பட்ட "தி ஸ்டார்" நாளிதழில் இந்த செய்தியை வாசித்தேன். அந்த செய்தியைப் படித்த எனக்கு அதிர்ச்சி ஏற்பட்டாலும், பாட்டியின் தைரியத்தை நினைத்து எனக்கு பெரும் மகிழ்ச்சியாக உள்ளது. இது ஒரு நகைச்சுவை சம்பவமாக இருந்தாலும், இதற்குப் பிறகு லண்டனில் வசிக்கும் இளைர்கள் வயதானவர்களிடம் சற்று கவனமாகத்தான் இருக்க வேண்டும்.

ஆக்கம்: கலையமுதன் ரவீந்திரன்

(
தெமெங்கோங் இப்ராஹிம் ஆசிரியர் பயிற்சிக் கல்லூரி)

வியாழன், 16 அக்டோபர், 2008

அடியேன் எண்ணங்களில் அலைபாய்ந்து கொண்டிருக்கும்,மலேசியாவில் இன்றைய தமிழின் நிலைமை.(அலைகள் மூன்று )

மீண்டும் போகின்றது அடியேனின் எண்ணங்கள், தமிழ் மொழிக்கு சுடர் கொடுக்க ஒற்றுமையோடு உயர்வோம்.. ஆம், இன்றைய சிறு எண்ணம் யாதெனில் மாணவர்களின் பங்காகும். விளக்கமாக கூறின் தமிழை வளர்க்க மாணவர்கள் அளப்பறியாது ஆற்ற வேண்டிய சில கடமைகள் ஆகும்.

முதலாவதாக மாணவர்கள் தமிழ் பள்ளிக்கு செல்வதில் ஆர்வம் செலுத்த வேண்டும். இவ்வார்மானது பிள்ளைகளுக்கு சிறு வயது முதலே வளர வேண்டும். பிறந்தது முதலே அவர்களுக்கு தமிழில் பேச பழக கற்று தர வேண்டும். இப்படி செயதொமாயினில் பிள்ளைகளுக்கு தமிழை கற்க சுய ஆர்வம் தோன்றும்.

பின்னர், தமிழைக் கற்று தரப்படும் பாலர் பள்ளிக்கு அனுப்ப வேண்டும். பாலர் பள்ளியில் குழந்தைகள் தமிழை ஆர்வமோடு கற்க பெற்றோர்கள் மற்றும் ஆசிரியர்கள் சற்று அதிகமாகவே வியர்வை சிந்த வேண்டும். மாணவர்கள் தமிழை எளிய வகையில் புரிந்துக் கொள்ள கூடிய நிலைமையில் தமிழை போதிக்க வேண்டும்.

மேலும்,வேற்று மொழி புத்தகங்களை தவிர்த்து தமிழ் மொழியில் பிரசுரிக்க பட்ட புத்தகங்களை அதிகம் பயில மாணவர்களை தூண்ட வேண்டும். அதும் மட்டுமா மாணவர்களாகிய நாமும் இவை அனைத்தையும் கருத்தில் கொண்டு முழு மூச்சோடு தமிழை கற்றுக் கொள்ள வேண்டும்.

இறுதியாக இடை நிலைப் பள்ளி மாணவர்கள் வயதில் மூத்தவர்கள் என்ற முறையில் மட்டுமல்லாமல் செயலிலும் மூத்தவர்கள் என நிரூபிக்க பி.எம்.ஆர்., எஸ்.பி.எம்., மற்றும் எஸ்.தி.பி.எம், ஆகிய சோதனைகளில் தமிழ் மொழி மற்றும் தமிழ் மொழி இலக்கிய பாடத்தை கற்றுக் கொள்வதை சுய ஆர்வத்தோடு கட்டாயமாக்கி கொள்ள வேண்டும்.

மீண்டும் அடியேனின் எண்ணங்கள் தொடரும். அலைகள் ஓய்வதில்லை அது போல அடியேனின் எண்ணங்களும் என்றும் ஓய்வதில்லை. மீண்டும் அலைகள் பாயும் வரை அடியேனின் அன்பார்ந்த வாழ்துக்கள், நன்றி.

ஆக்கம்: கீர்த்தி செல்வராஜூ
(தெமெங்கோங் இப்ராஹிம் ஆசிரியர் பயிற்சிக் கல்லூரி)

ஞாயிறு, 12 அக்டோபர், 2008

மலேசிய இந்திய இளைஞனே நீ கண் விழி......


இன்றைய உலகம் மட்டுமே நவ நாகரீகத்திற்கு மாறியுள்ளதே தவிர, நமது மலேசிய இந்திய இளைஞர்கள் இன்றும் அன்று போலவேதான் இருக்கிறார்கள். ஆம் அன்பர்களே உலகம் இந்த சில பல ஆண்டுகளில் எவ்வளவோ மாறுதல்களை கண்டுள்ளது மக்கள் அம்மாருதல்களை புரிகின்றினர். ஆனால், நமது இந்திய இளைஞர்கள் இன்றும் மாறுதல்களை கண்டு வியப்பவர்கலாகவே இருக்கிறார்களே தவிர எந்த ஒரு மாறுதல்களையும் நிகழ்த்த வில்லை.இதற்கான காரணம் என்ன?

அஸ்திவாரம் சரியாக அமைந்தால் தான் ஒரு கட்டிடம் மேலோங்கி முழுமையாக நிற்கும் இல்லையென்றால் அக்கட்டிடம் சில நொடிகளில் கூட சரிந்து விழலாம். அது போலத்தான் இந்திய இளைஞன் ஒருவன் மேலோங்கி நிற்க வயதில் மூத்தவர்கள், இன்னும் அழுத்தமாக சொல்ல சொன்னால் போதுமான தலைமைத்துவம் நிலவ வேண்டும் நம் இந்தியர்களிடையே! வயதில் மூத்தவர்களுக்கு மட்டும் அல்ல மாறாக இளைஞனே உன்னை தான் சொல்கிறேன் தலைமை துவம் உன்னில் தேடு இவ்வுலகம் உன்னை போற்றும்.

ஆனால், தலைமைத்துவம் மட்டும் இருந்தால் போதுமா? இல்லை அத்தோடு இளைஞர்கள் நீங்கள் உங்கள் ஆசையை அதாவது ஆணவம்,கன்மம்,மாயை ஆகிய இம்மூன்றையும் விட்டொழிக்க வேண்டும். ஆசை யாரை விட்டது என்று உங்களுள் தோன்றலாம். ஆம், ஆசையை அகற்ற முடியாது ஆனால் குறைக்கலாம் அல்லவா? சிந்தியுங்கள் இளைஞர்களே! ஆசையை கட்டு படுத்தி நாட்டையும் சரி வீட்டையும் சரி ஏன் எதுவாக இருப்பினும் மேலோங்க செய்ய இந்திய இளைஞன் நாம்தான் பங்காற்ற வேண்டும். நமது போதுமான நேரத்தை போதுமான வகையில் செலவிட பழகிக் கொள்ள வேண்டும். இன்றைய பல இந்திய இளைஞர்கள் போதைப் பொருள் அடிமை, விலை மாதுவுக்கு அடிமை, மற்றும் நண்பர்களிடத்து அடிமை போன்று இன்னும் எத்தனையோ வகையில் சீரழிகின்றனர். சீரழிப்பதை தவிர்க்க இளைஞனே நீ கண் விழி...


மேலும், இன்றைய இந்திய இளைஞனே நமக்கான வாய்ப்பு மிகக் குறுகிய நிலையில் தான் இன்றும் நமது நாட்டில் அமைந்துள்ளது. அதாவது மேல் படிப்பு படிப்பதற்கான வாய்ப்பு, வியாபார ரீதியிலான வாய்ப்பு, அதைத் தவிர்த்து இன்னும் எத்தனையோ வாய்ப்புகளை நமது இளைஞர்கள் தவற விட்டு விடுகின்றனர் அத்தோடு தவற வைக்க விடுகின்றனர். அதாவது ஒன்றாவது போதுமான மதிப்பெண்களை பெற்றிருந்தும் குறிப்பிட்ட சில மேல் படிப்பு மையங்கள் அவர்களுக்கு வாய்ப்பு அளிப்பதில்லை, மற்றொன்று இளைஞர்கள் தாமாகவே குறைந்த மதிப்பெண்களை பெற்று விட்டு பிறகு மேல் கல்வி கூடங்களை சாடுகின்றனர். இம்மாதிரியான நிகழ்வுகளை தவிர்க்க இளைஞர்கள்
கிடைக்க பெரும் ஒவ்வொரு வாய்ப்புகளையும் நல்வழியில் பயன் படுத்திக் கொள்ள வேண்டும்.

இறுதியாக, நான் கூறிக் கொள்ள விரும்புவது என்னவென்றால், நமது இந்திய இளைஞர்கள் காற்று உள்ள போதே தூற்றிக் கொள்ள வேண்டும், மேலும் பொறுத்தவன் பூமி ஆள்வான் என்பதற்கொப்ப எதுவாக இருப்பினும் தீர ஆலோசித்து பிறகு, சரியான முடிவை தேர்வு செய்து அதனை நடை முறைக்கு கொண்டு வர வேண்டும். நமது நாட்டில் ஐம்பத்து ஆண்டுகள் நாம் அதாவது இந்திய இளைஞர்கள் பல இன்னல்களுக்கு உட்பட்டு இன்று ஓர் அளவிற்கு தலை தூக்க ஆரம்பித்து உள்ளோம் இதனை தொடர்வதற்கு அரசாங்கமும் அரசாங்க சார்பற்ற நிறுவனங்களும் அதோடு பற்பல கழகங்களும் கை கோர்த்து நம் இந்திய இளைஞர்கள் ஒரு புதியதோர் விடி வெள்ளி நிலைமைக்கு கொண்டுச் செல்ல பெரிதும் துணைப்புரிய வேண்டும்.

எதுவாக அமையினும் இவ்வளவு முயற்சிகளுக்கு பிறகும் நமது இளைஞர்கள் தோல்வியை தழுவினார்களே யானால் அதற்கு பிறகும் அத்தோல்விக்கு அவ்விளைஞனே முழு காரணம்.

சிந்தனைத் துளி: வசந்தராவ் அப்பளசாமி
இயற்றியது: கீர்த்தி செல்வராஜூ
(தெமெங்கோங் இப்ராஹிம் ஆசிரியர் பயிற்சிக் கல்லூரி)

வியாழன், 9 அக்டோபர், 2008

அன்பு


‘அன்பு’ மூன்றே எழுத்துக்களால் ஆனது.ஆனால் இப்பூவலகையே இயக்கி கொண்டிருக்கும் ஒரு அற்புதமான ஆயுதம் என்று சொன்னால் அதை மறுப்பார் இல்லை.நட்பு, அருள்,பக்தி என்பது அன்பிற்க்குச் சொல்லப்படும் வேறு விளக்கங்களாகும்.நாம் அன்பிற்க்குப் பல உதாராணங்கள் கொடுக்கலாம்.ஒரு தாய் தன் குழந்தைப் பால் வைத்திருப்பது அன்பு,ஒரு அண்ணன் தன் தம்பி மீது வைத்திருப்பதும் அன்பு, ஒரு பசு தன் கன்று மீது வைத்திருப்பதும் அன்புதான்.நாம் ஒருவர் மீது வைத்திருக்கும் அன்பானது தெய்வமானதாகவும் உண்மையானதாகவும் இருக்க வேண்டும்.நாம் யார் மீது அன்பு வைத்திருக்கிறோம் என்பது முக்கியமல்ல ஆனால்,நாம் வைத்திருக்கும் அன்பானது எந்த ஒரு பிரதிபலனையும் எதிர்ப்பார்க்காமல் இருப்பதை உறுதி செய்ய வேண்டும்.



அன்பானவர்களை நீங்கள் பார்த்ததுண்டா?அனைவரும் அன்பானவர்களையே அதிகம் விரும்புவர்.தம் மனதில் உண்மையான அன்பு கொண்டவர்கள் பண்பாகவும் கனிவாகவும் பேசி’ காந்தம் இரும்பைக் கவர்வது போல’ அனைவரையும் தன் வசம் ஈர்ப்பார்கள்.அன்பானவர்கள் தம் உயிரை காட்டிலும் மற்றவர்களின் உயிர் மீது அதிக அக்கறை வைத்திருப்பர்.சிறு உயிரினங்களுக்கும் ஏதாவது துன்பம் நேரிட்டால் ‘ அனலில் இட்டப் புழுப் போல’ துடிதுடிப்பார்கள்.இவர்கள் மனிதர்களையோ அல்லது மிருகங்களையோ வேறுப்படுத்திப் பார்க்கமாட்டர்கள்.


உலக அதிசயங்களில் ஒன்றான தாஜ்மகாலை அனைவரும் அறிந்திருப்பீர்.தாஜ்மகாலை ஷாஜகான் என்பவர் தன் ஆசை மனைவியின் இறப்பிற்க்கு பின்னர் கட்டினார்.இது அவர் தன் மனைவியின் மீது எவ்வளவு அன்பு வைத்திருக்கிறார் என்று ‘உள்ளங்கை நெல்லிக்கனிப் போல’அனைவருக்கும் தெளிவாக தெரிய வைக்கின்றது.அக்காலத்திலே அன்பிற்க்கு இலக்கணமாக திகழ்ந்துள்ளார் ஷாஜகான். ஆனால், இன்றைய நிலமையை நாம் சற்று பின் நோக்கிப்பார்த்தோமேயானால் அது நமக்குப் பெரிய ஏமாற்றத்தையும் வருத்தத்தையுமே முன் வைக்கின்றது.அக்காலத்து மனிதர்களிடையே முன்னேற்றம் ஏதுமில்லாதப் போதும் அன்பானவர்களாகத் திகழ்ந்தார்கள்.ஆனால், இக்காலங்களில் நாம் அடைந்துள்ள வளர்ச்சிக்கு ஈடுக்கொடுத்து ஒவ்வொரு நாளும் ஆங்காங்கே கொலை,கொள்ளை,கற்பழிப்பு போன்றவை நடந்த வண்ணமாகத்தான் உள்ளது.ஏன் இவர்களின் நெஞ்சங்கள் கல்லால் ஆனாதா?இல்லை இவர்களுக்கு அன்பு என்ற சொல்லுக்கே பொருள் தெரியாதா?


‘அன்பின் வழியது உயர்நிலை அஃதிலார்க்கு என்புதோல் போர்த்த உடம்பு.’

இது அன்பைப் பற்றி திருவள்ளுவர் எழுதியுள்ள குறள்களில் ஒன்றாகும்.அன்புக் கொண்டு வாழ்பவர்கள்தான் மனிதர்கள் என்றும், அன்பில்லா மனித வாழ்வு உடம்பில் சதையை கொண்ட வாழ்வாகவே முடிந்து விடும் என்கிறார்.அவ்வாறு வாழ்வது வாழ்க்கையே இல்லை என்கிறார்.இதை நாம் என்னாலுமே கடைப்பிடிக்க வேண்டும்.அன்பு இவ்வுலகில் எதையுமே செய்யக்கூடிய சக்தி வாய்ந்தது.


அன்பு படைத்த மனிதர்கள் தெய்வத்திற்க்குச் சமமாகவும் அன்பில்லா மனிதர்கள் மரக்கட்டைகளுக்குச் சமமாகவும் கருதப் படுவர். அன்பின் பாதையில் செல்கின்றவர்கள் என்றுமே வெற்றி அடைவார்கள். தங்களுக்கென்று துன்பம் நேரிடும்போது அனைவரும் தோள் கொடுத்து உதவுவர். நாம் இவ்வுலகில் விடும் கடைசி மூச்சு வரை அன்பின் ஆழத்தை உணர்ந்து புரிந்து வாழ முயற்ச்சிப்போம்.


அன்பே சிவம்!

ஆக்கம்: ரேகா ராஜு
(தெமெங்கோங் இப்ராஹிம் ஆசிரியர் பயிற்சிக் கல்லூரி)

புதன், 8 அக்டோபர், 2008

ஒளி விளக்கு...



வாழ்க்கை என்பது கடலில் செல்லும் படகு. அதில் பிடிமானம் இருந்தால்தான் கரைச் சேர முடியும். அதேபோல் கல்வி இருந்தால் வாழ்வில் முன்னேற முடியும். வாழ்கையை ஒளி வீச வைக்கும் விளக்காக கல்வி திகழ்கின்றது. கல்வி என்பது கல் மாதிரி மிகவும் பலம் வாய்ந்த ஒன்றாகும். கல்வி சவால் நிறைந்த அனைத்திற்கும் துணைப் போல் நின்று துனைப்புரிகின்றது.

கல்வி மனித வாழ்வின் அடிப்படை என்று கூறினால் மிகையாகாது. இவ்வுலகில் பிறந்த அனைத்து ஜீவராசிகளோடு ஒப்பிடும் போது மனிதனே தனித்து காணப்படுகிறான். இதற்கு கடவுள் மனிதனுக்கு மட்டுமே படைத்துள்ள சிந்தனைத் திறனே காரணமாகும். அந்த சிந்தனைத் திறனை நன்முறையில் பயன் படுத்தி பல சாதனைகளைப் படைப்பதற்கு ஊன்றுகோலாக அமைவதே கல்வி ஆகும்.

கல்வி என்பது அமிர்தம் நிறைந்த கடலாகும். எனவே, பிறந்த பலனை முழுமையாக அடைய அக்கடலில் மூழ்கி எழ வேண்டும். கல்வி எல்லையற்றது. அது அமுதச்சுரபி போல் பயன் படுத்த வந்துக் கொண்டேயிருக்கும். "கற்றது கை மண்ணளவு கல்லாதது உலகளவு" என்பது இதற்கு ஒரு சான்றாகும்.

வாழ்வில் வெற்றிப் பெற தன்னம்பிக்கையும் மனவுறுதியும் மிக முக்கியம் என்று அறிவியல் பூர்வமாக கண்டு பிடித்துள்ளனர். இவ்விரண்டும் கல்வியினாலே கிடைக்கும் என்பதே சிறப்பான ஒன்றாகும். கல்வி என்ற மூன்று எழுத்து மனிதனின் தலை எழுத்தை நிர்ணயிக்கின்றது என்று தாராளமாக கூறலாம்.

ஆகவே,கல்வி என்பது வாழ்கையை ஒளி வீசும் விளக்காகும். கல்வியினால் சிறந்த விளங்கி நாட்டின் நற்பெயரை உச்சிக்குக் கொண்டு செல்லுதல் ஒவ்வொரு குடிமகனின் கடமையாகும். இத்தனை உணர்ந்து கல்விக் கற்ற சமுதாயமாக திகள தகுந்த நடவடிக்கைகளை வகுக்க வேண்டும்.

ஆக்கம்: ஷாலினி நடராஜன்
(தெமெங்கோங் இப்ராஹிம் ஆசிரியர் பயிற்சிக் கல்லூரி)

திங்கள், 6 அக்டோபர், 2008

தடுமாறும் இளமையில் காதல்

காதல் என்றால் என்ன? காதல் எப்படிப்பட்டது ? காதல் எவ்வாறு அமைய வேண்டும் ? என்றெல்லாம் இக்காலக்கட்டத்தில் எவருமே அறிந்திருக்க வில்லை, முக்கியமாக நம் இளையோர்கள்! காதல் என்பது நமக்கு ஒருவர் மீது ஏற்படக்கூடிய தூய்மையான, தெய்வீகமான, உன்னதமான, அன்பு பாசம் உணர்வு மற்றும் பிணைப்பு என பல்வேறு வார்த்தைகளால் அடுக்கிக் கொண்டே போகலாம். காதலை எவன் ஒருவன் தன் வாழ்வில் போற்றுகிரானோ அவனே காதலின் மாண்பை அறிந்தவன் ஆவான்.

ஆனால், இன்றைய காலக் கட்டத்தில் காதல் நம்மவர்களுக்கு ஒரு விளையாட்டு பொம்மையாக அமைந்து விட்டது. இப்பொழுது எல்லாம் ஆண்களோ சரி பெண்களோ சரி இவன் இல்லை என்றால் இன்னொருவன் என்றும் இவள் இல்லை என்றால் இன்னொருவள் என்றும் அவர்களின் என்னத்தை மாற்றிக் கொண்டனர். காதலின் முக்கிய அம்சமே ஒருத்தனுக்கு ஒருத்தி என்பதை நம் இளையோர்கள் உணர வில்லை. சுருங்கக் கூறின் சில மாதங்களுக்கு ஒரு முறை தங்களின் காதலன் அல்லது காதலியை மாற்றிக் கொள்வது இந்த நவீன நீரோட்டத்தில் இளையோர்களுக்கு ஒரு பொழுதுபோக்காகவே அமைந்து விட்டது. இதற்க்கு காரணம்....??? ஒன்று மேற்கத்திய மோகம் இன்னொன்று சினிமா........ சினிமாவில் எப்படி கதாநாயகன் கதாநாயகியின் அழகைக் கண்டு சில வினாடிகளில் மயங்குகிரானோ அது போலவே தன்னையும் கதாநாயகனாக நினைத்து உடனே காதலில் விழுகிறார்கள். சினிமா காட்சி போல தங்களின் காதலை கடிதம் மூலமும் குறுந் செய்தி மூலமும் வெளிப் படுத்தி கொள்கின்றனர். குறுந் செய்தி மூலமாக வெளிப் படுத்தக் கூடிய விஷயமா காதல்???


தனக்கு தானே எது நல்லது எது கேட்டது என்று முடிவெடுக்க தெரியாத வயதில் காதலிக்க வேண்டியது. சினிமா காட்சி போல காதலியை அழைத்துக் கொண்டு ஊர் சுற்றி விட்டு பெற்றோர்கள் பணத்தில் சில நாட்களுக்கு சந்தோஷமாக இருந்து விட்டு பிறகு பழைய காதலியை விட இன்னும் கொஞ்சம் அழகான பெண்ணை பார்த்தும் பழைய காதலியைக் கை விட்டு விடுவதே இக்கால ilaiyorgalin வேலையாகும். இதை விடக் கொடுமை அப்பெண்ணும் ஒருவன் தன்னை விட்டுசென்றதும் வேறொருவனுடன் ஊர் சுற்றுவதே ஆகும். மாற்றி மாற்றி காதலிக்க காதல் என்ன ஆடிய இளையோர்களே?

ஆகவே, ஆண்களாக இருந்தாலும் சரி பெண்களாக இருந்தாலும் சரி சினிமாவைப் பார்த்து காதலை இழிவு படுத்தக் கூடாது. சினிமா மூன்று மணி நேரமே! ஆனால் வாழ்கை? யோசித்து பாருங்கள், சினிமா காட்சிகள் வாழ்கையின் நடை முறைக்கு ஒத்து வராத ஒரு விஷயம். சினிமாவிலும் நல்ல காட்சிகளை காதலுக்க்காகவே படைத்துக் காட்டுகிறார்கள். காதலை அடைய என்ன பிரச்சனை நேர்ந்தாலும் போராடி அதை அடைய வேண்டும். ஆனால், இன்று காதலுக்காக போராடுகிறவர்களை யாரும் உதாரணமாக எடுத்துக் கொள்வதில்லை, காதல் பெயரை சொல்லி தற்கொலை செய்து கொள்பவர்களை பார்த்து தற்காலத்தில் தற்கொலை செய்து கொள்ளும் கோழையான இள காதலர்கள் இன்னும் கூட இருந்துக் கொண்டுதான் இருக்கிறார்கள்.

எனவே, இளையோர்களே காதல் என்பது நமக்கு ஒரு நல்ல வாழ்க்கைத் துணையை ஏற்படுத்திக் கொள்வதில் உதவும். இள வயதில் காதலிப்பது தவறல்ல, அக்காதல் உண்மையானதா? நிலைத்து நிற்கக் கூடியதா? அக்காதல் பக்குவப் பட்டதா? என சிந்தித்து செயல் பட வேண்டும். இள காதலர்களே சிந்தியுங்கள் பல முறை சிறந்த முடிவுக்காக.......!

"காதல் ஒன்றும் முக அழகைக் கண்டும் உடல் அழகைக் கண்டும்
வருவதில்லை அது அக அழகைக் கண்டு பூ பூப்பதாகும்"

ஆக்கம்: திலகவதி திருமலை
(தெமெங்கோங் இப்ராஹிம் ஆசிரியர் பயிற்சிக் கல்லூரி)

வியாழன், 2 அக்டோபர், 2008

புரியாத புதிர்

கடந்து வந்த பாதையில் உன் நினைவுகள் என்னை மீண்டும் வருடச்செய்கின்றது.

உனக்காக நான் காத்திருக்கும் அந்த நொடிகள் உன் நiனைவை விட்டு நீங்கிவிட்டதா?

பார்க்கும் ஒவ்வொரு திசையும் உந்தன் முகம் என்னை தேடவைக்கின்றது.

இதயமே, நீ இல்லாத அந்த சிறு கனமும் என் உயிர் உனக்காக ஏங்குகின்றது.

உன் உயிராய் என்னை ஏற்றுக் கொள்ளும் நாளுக்காக என்றும் காத்திருப்பேன் என் ஆறுயிரே…

என்றும் ஏக்கத்துடன் உந்தன் ???????????

ஆக்கம்: யோகேஸ்வரி தனபால்
(தெமெங்கோங் இப்ராஹிம் ஆசிரியர் பயிற்சிக் கல்லூரி)